Apnon Ke 2, 2 Roop

Raat ke 1 baj rahay thay aur main aik anjaan truck driver k sath aik anjaan aur veeran si sarak per safar ker raha tha, aik aisi jagah jahan main kabhi din main bhi nahi gaya tha wahan main aadhi raat ko kese pohncha, ye main bhi na soch sakta tha.
Aap kabhi bhi waqt ko predict nahi ker saktay, aap chahay jitne hi baray scholar, researcher, businessman ya thinker hi kyun na hon, aap waqt se khelne ki koshish krain ke tou waqt kab kese aur kis tarah aap se khel ker jayega aap k gumaan main bhi na hoga. Kher, mere sath tou waqt ne koi aise khel nahi khelay kyun main khud zara pangay lene main susti kerta hoon.
Mujhe kuch arsa pehle apne hometown jana tha jo k Lahore se Islmabad jatay hue Pindi Bhattian se zara faaslay per waqia hai, Motorway se Pindi Bhattian Bypass per utar ker agay wagon main jana parta hai, jo muqami afrad se full bhari hoti hai ke aap apna bazu hilayen ge tou adhay musaafiron ko maloom hojayega. Kher main Karachi se Lahore jahaz se gaya, jis ne mujhe taqreeban mujhe raat 10 bajay Lahore pohnchaya, ab agay apne qasbay janay k liay mujhe Pindi Bhattian ki Bus pakarni thi jo k raat ko aksar mushkil milti hai kyun k uss taraf k musafir kam hote hain tou transporters agar betha bhi lain tou karaya Sargodha ka charge kerte hain. Mujhe bari mushkil se Niazi Travels ki aik Bus mili jo mushkil se mujhe Pindi Bhattian lejanay per razamand hue, aur poori Bus main sirf main hi uss taraf ka musafir tha. Bus bhartay bhartay raat k 12 baj gaye, maine socha kher hai Pindi Bhattian se kisi Taxi main apne qasbay chala jaun ga. Abbu ki calls pe calls aa rahi thien, wo mera intezar ker rahay thay, Allah Allah ker k Bus chali aur taqreeban aik ghantay baad Pindi Bhattian k nazdeek pohnchi. Main seat se uth k driver ki taraf gaya k ye abhi Bus ko Toll Plaza pe rok ker mujhe utaar dain, lekin Bus ki speed kam na hui tou mene zor se bola k mujhe utaar dain mera shehr aa gaya hai, conductor jo k aik bhaari bharkam ghunda type insan tha wo bola chup ho jao abhi agay bridge pe utaarain ge agay paidal chalay jana. Lekin bus ki speed kam na ho rahi thi, raat ka 1 baj raha tha aur mujhe fiker khaye ja rahi k main agay kese jaun ga. Bus k driver aur 2 conducteron ki badmaashi jaari rahi, main akela musafir un se lar raha k mujhe utaarain lekin wo meri baat na sunain, main cheekha k ye kya badmashi hai, tou wo mujhse larnay ko aayen. Achanak unho ne Pindi Bhattian se 13km agay motorway kisi gaon k pas Bus rok di aur bolay utar jao. Main marta kya na kerta, akeli jaan, utar gaya. Sunsaan motorway, ghup andhera, boundary wall ek jagah se tooti hui thi, maine cross ki. Mere aik hath main laptop ka bag, doosray main DSLR camera. Main gaon ke toll plaza pe pohncha, wahan 4 afraad nazar aaye, maine unko apna qissa sunaya aur kaha k mehrbani ker k mujhe koi taxi le dain ta k main apne ghar ja sakoon. Mere ghar walay pareshan hain. Wo bolay ye tou ek chhota sa gaon hai, yahan iss time taxi na mil sakay gi, haan truck guzartay hain, un main se kisi aik pe baat ker k betha sakte hain. Main chup raha, itne main aik truck agaya, guard agay barha aur truck walay se baat ki aur mujhe bola k iss main beth jao. Mere dil main khauf tha, main raat k iss pehar ajnabiyon se madad maang raha tha aur unho ne mujhe kisi teesray ajnabi k hawalay ker dia. Aur ab main aik anjaan truck driver k sath aik anjaan aur veeran si sarak per safar ker raha tha, aik aisi jagah jahan main kabhi din main bhi nahi gaya tha wahan main aadhi raat ko kese pohnch gaya, ye maine socha bhi na tha. Truck main 2 afraad thay, aik naujawan larka jo drive ker raha tha aur aik bari umar k uncle jo shyd so rahay thay pehle aur phir unho ne mujhe jagah di. Main koshish ker raha tha k main normal behave kerun, daroon nahi, kyun k mere sath aisa tajurba pehle paish na aya tha. Maine truck walay ko bhi apni kahani sunaai aur kaha k bas mujhe Pindi Bhattian tak utaar dain agay main khud kisi Bus ya Taxi main chala jaun ga. Wo 13 km ka rasta ajeeb se makhmasay main guzra, humesha ki tarah Chautha Kalma, Ayet ul Kursi aur safar ki dua ka wird kerta raha aur humesha ki tarah Allah ne hifazat ki. Pindi Bhattian pohnch ker maine truck walay ko kuch paisay dene ki koshish ki lekin uss insan ne sirf 2 alfaz bolay k "Dua kerna.”

Kahan wo paisay bachanay aur zyada kamanay k chakkar main musafiron ko zaleel o khawaar kerne walay transporters aur kahan raaton ko mehnat mazdoori aur driving ker k rozi kamanay wala truck driver. Ab main society ko aur apne logon ko gaaliyan dena bhi chahun tou nai de sakta, maine kuch ghanton main "apnon” ke dono roop dekhe hain.

Advertisements

14 خیالات “Apnon Ke 2, 2 Roop” پہ

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ / تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ / تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ / تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ / تبدیل کریں )

Connecting to %s